Saturs

Ðîs sadaïas teksta tulkojums latvieðu valodâ (02017.-03013.rinda)

Iepriekðçjâ sadaïa vidusaugðvâcu valodâ (01005.-02016.rinda)

Nâkamâ sadaïa vidusaugðvâcu valodâ (03018.-04030.rinda)

Livlädische Reimchronik (02017.-03017.)

(02017.) Meister Balke dâchte dô,

(02018.) wie er sîn ding vûgete sô,

(02019.) daß im die lûte wêren holt

(02020.) und daß er ouch gotes solt

(02021.) von keinen schulden verlure.

(02022.) daß legete er im vil dicke vure

(02023.) und kârte an tugende sînen mût.

(02024.) er was mit zuchten wol behût.

(02025.) wie eß in dem lande was getân

(02026.) daß wart im alleß wißßen lân.

(02027.) Revele und Wierlant

(02028.) daß was in der brûdere hant

(02029.) eine gûte wîle gewesen,

(02030.) die ûch die vor sin gelesen,

(02031.) die ir zeichen legeten nider

(02032.) und daß crûce entpfiengen wider,

(02033.) swertbrûdere wâren sie genant.

(02034.) sie hatten burge und lant

(02035.) der heidenschaft betwungen abe

(02036.) und an gûte grôße habe.

(02037.) daß wart dem dûtschen hûse dô:

(02038.) des wart daß lant gemeine vrô.

(02039.) Nû hatte der meister wol vernomen,

(02040.) wie eß umme Revele was komen,

(02041.) daß konic Waldemâr dar ûf sprach.

(02042.) dar nâch nicht lange eß geschach,

(02043.) boten wurden dô gesant:

(02044.) dem pâbeste tâten sie eß bekant.

(02045.) dô der pâbest des wart gewar,

(02046.) er sante sînen boten dar

(02047.) einen wîsen legât.

(02048.) der vant dar undir einen rât,

(02049.) daß Haryen, Revele, Wierlant

(02050.) dem konige wart in sîne hant,

(02051.) der dô in Denemarken riet.

(02052.) den brûderen er ein lant beschiet,

(02053.) Jerwen heißet daß lant,

(02054.) daß gab er in der brûdere hant

(02055.) vur eigen êwiclîche.

(02056.) die selben gâbe rîche

(02057.) gab der kunic Waldemâr

(02058.) dem dûtschen hûse, daß ist wâr,

(02059.) durch got von himelrîche;

(02060.) der lônet eß êwiclîche.

(02061.) die lantscheide wart beschriben,

(02062.) die ummer sider stête ist bliben,

(02063.) die kein man gebrechen mac

(02064.) biß an den jungesten tac.

(02065.) Nû lege wir die rede nider

(02066.) und sprechen abir wider,

(02067.) wie iß dem dûtschen hûs in hant

(02068.) zû dem êrsten gienc in Nieflant.

(02069.) von Darbete bischof Herman

(02070.) bie den zîten began

(02071.) zeisen mit den Rûßen.

(02072.) die wolden sich ûf strûßen

(02073.) kegen dem cristentûme als ê.

(02074.) in tet ir unsâlde vil wê.

(02075.) sie tâten leides im genûc.

(02076.) dô er daß lange vertrûc

(02077.) die brûdere er zû hulfe bat.

(02078.) der meister quam im ûf der stat

(02079.) und brâcht im manchen rischen helt

(02080.) beide kûne und ûß irwelt.

(02081.) des kuniges man quâmen dar

(02082.) mit einer hovelîchen schar;

(02083.) des was bischof Herman vrô.

(02084.) mit deme here sie kârten dô

(02085.) vrôlîchen in der Rûßen lant.

(02086.) eß gienc in dâ vil wol in hant.

(02087.) vor eine burg sie quâmen dô,

(02088.) die was irre kumft unvrô.

(02089.) sturmes man mit in began,

(02090.) daß hûs gewunnen sie in an.

(02091.) Îsburc die burc hieß.

(02092.) der Rûßen man keinen ließ,

(02093.) man brêchte in in nôt.

(02094.) welcher sich zû were bôt,

(02095.) der wart gevangen oder geslagen.

(02096.) man hôrte rûfen und clagen:

(02097.) in deme lande ubir al

(02098.) erhûb sich ein michel schal.

(02099.) Die von Plezcowe dô

(02100.) wâren diser mêre unvrô.

(02101.) eine stat ist sô genant,

(02102.) die liet in Rûßen lant.

(02103.) dâ sint lûte harte sûr,

(02104.) die wâren diser nâkebûr.

(02105.) von den wart nicht gespart,

(02106.) sie hûben sich ûf die vart

(02107.) und jageten grimmelîchen dar

(02108.) mit mancher brunjen lîchtvar;

(02109.) ir helme lûchten als ein glas.

(02110.) vil manich schutze dâ mite was.

(02111.) sie quâmen ûf der brûder her;

(02112.) die satzten sich kein in zû wer.

(02113.) die brûdere und des kuniges man

(02114.) die Rûßen vrîlîchen riten an.

(02115.) bischof Herman der was dar

(02116.) als ein helt mit sîner schar.

(02117.) sich hûb ein ungevûger strît:

(02118.) die dûtschen hiwen wunden wît,

(02119.) die Rûßen liden grôße nôt:

(02120.) man slûc ir achte hundert tôt,

(02121.) die bliben ûf deme wal.

(02122.) bie Îsburc nâmen sie den val.

(02123.) die anderen nâmen dâ die vlucht,

(02124.) man jagete sie âne zucht

(02125.) vaste hin zû lande wert.

(02126.) die Rûßen manten sêre ir pfert

(02127.) beide mit geiseln und mit sporn;

(02128.) sie wânten alle sîn verlorn:

(02129.) der wec dûchte sie gar lanc.

(02130.) der walt von jâmerschalle clanc.

(02131.) zû lande was in allen gâch;

(02132.) der brûdere her zogete hin nâch.

(02133.) die Mode ein waßßer ist genant:

(02134.) nâ in uber ûf daß lant

(02135.) die brûdere vûren mit gewalt;

(02136.) sie brâchten manchen degen balt.

(02137.) Die von Plezcowe dô

(02138.) wâren der geste unvrô.

(02139.) die brûdere slûgen ir gezelt

(02140.) vor Plezcowe ûf ein schône velt.

(02141.) der bischof und des koniges man

(02142.) ir legirstat vil wol gewan.

(02143.) manich ritter und knecht

(02144.) vordienten wol ir lêgenrecht.

(02145.) man ließ gebieten in dem her,

(02146.) man solde bereiten sich zûr wer,

(02147.) und ließ sie dâ bie verstân,

(02148.) man solde ouch zû sturme gân.

(02149.) die Rûßen wurden des gewar,

(02150.) daß sturmen wolde manich schar

(02151.) beide burc unde stat.

(02152.) die Rûßen wâren strîtes mat

(02153.) dâ vor bie Îsburc worden:

(02154.) sie boten sich dem orden,

(02155.) wan sie vorchten ungemach.

(02156.) um einen vride man dô sprach.

(02157.) der vride wart gemachet dô

(02158.) mit den Rûßen alsô,

(02159.) daß Gêrpolt, der ir kunic hieß,

(02160.) mit sîme gûten willen ließ

(02161.) burge und gûte lant

(02162.) in der dûtschen brûdere hant,

(02163.) daß ir der meister solde pflegen.

(02164.) dô bleib daß sturmen under wegen.

(02165.) Dâ die sûne geschach,

(02166.) nicht lange sûmete man dar nâch,

(02167.) daß her brach ûf gemeine dô.

(02168.) sie wâren alle in gote vrô

(02169.) und gâben gote die êre:

(02170.) sie dankten im vil sêre.

(02171.) dô daß her was bereit

(02172.) vrôlîch iß von dannen reit.

(02173.) zwêne brûdere man dar ließ

(02174.) die man daß lant bewaren hieß,

(02175.) von dûtschen eine cleine macht.

(02176.) daß wart in sint zû schaden brâcht:

(02177.) ir hêrschaft werte unlange vrist.

(02178.) eine stat in Rûßen lande ist,

(02179.) Nogarden ist sie genant.

(02180.) dem kunige wart daß mêre bekant,

(02181.) er hûb sich ûf mit mancher schar

(02182.) kegen Plezcowen, daß ist wâr.

(02183.) dar quam er mit grôßer macht;

(02184.) er hette manchen Rûßen brâcht

(02185.) zû lôsene die von Plezcô.

(02186.) des wâren die von herzen vrô.

(02187.) dô er die dûtschen irsach,

(02188.) nicht lange sûmete er dar nâch,

(02189.) die zwêne brûdere er verstieß

(02190.) der vogetîe er sie erließ

(02191.) und alle ir knechte man vertreib.

(02192.) der dûtschen keiner dâ bleib:

(02193.) den Rûßen ließen sie daß lant.

(02194.) den brûderen gienc iß sus in hant:

(02195.) wêre Plezcowe dâ behût

(02196.) daß wêre nû dem cristentûme gût

(02197.) biß an der werlde ende.

(02198.) eß ist ein missewende,

(02199.) der gûte lant betwungen hât

(02200.) und der nicht wol besetzet hât:

(02201.) der claget wen er den schaden hât,

(02202.) wan iß im vil lîchte missegât.

(02203.) der kunic von Nogarden kârte wider.

(02204.) Eß stûnt dar nâch nicht lange sider.

(02205.) ein stat ist grôß unde wiet

(02206.) die ouch in Rûßen lande liet:

(02207.) Susdal ist sie genant.

(02208.) Alexander was genant

(02209.) der bie der zît ir kunic hieß:

(02210.) sîn volc er sich bereiten ließ.

(02211.) den Rûßen was ir schade leit;

(02212.) snelle wurden sie bereit.

(02213.) dô vûr kunic Alexander,

(02214.) mit im vil manich ander

(02215.) Rûße her von Susdal.

(02216.) sie vûrten bogen âne zal,

(02217.) vil manche brunje wunneclîch.

(02218.) ir banier die wâren rîch,

(02219.) ir helme die wâren liecht bekant.

(02220.) sus zogeten sie in der brûder lant

(02221.) dâ gewaldeclîch mit her.

(02222.) die brûdere dâ mit sneller wer

(02223.) brâchten in daß kegenzil;

(02224.) ir was aber mâßen vil.

(02225.) Zû Darbete wart vernomen

(02226.) kunic Alexander wêre komen

(02227.) mit her in der brûder lant

(02228.) und stifte roub und brant.

(02229.) der bischof des nicht enließ,

(02230.) des stiftes man er snelle hieß

(02231.) îlen zû der brûdere her

(02232.) kegen den Rûßen zû wer.

(02233.) waß er gebôt daß geschach.

(02234.) nicht lange sûmeten sie dar nâch,

(02235.) sie quâmen zû der brûdere macht.

(02236.) sie hatten zû cleine volkes brâcht;

(02237.) der brûdere her was ouch zû clein.

(02238.) îdoch sie quâmen uber ein,

(02239.) daß sie die Rûßen ritten an.

(02240.) strîtes man mit in began.

(02241.) die Rûßen hatten schutzen vil,

(02242.) die hûben dô daß êrste spil

(02243.) menlîch vor des kuniges schar.

(02244.) man sach der brûder banier dar

(02245.) die schutzen underdringen,

(02246.) man hôrte swert dâ clingen

(02247.) und sach helme schrôten.

(02248.) an beider sît die tôten

(02249.) vielen nider ûf daß gras.

(02250.) wer in der brûdere her was

(02251.) die wurden ummeringet gar.

(02252.) die Rûßen hatten sulche schar,

(02253.) daß ie wol sechzic man

(02254.) einen dûtschen ritten an.

(02255.) die brûdere tâten wer gnûc,

(02256.) îdoch man sie dar nider slûc.

(02257.) der von Darbete quam ein teil

(02258.) von deme strîte, daß was ir heil:

(02259.) sie mûsten wîchen durch die nôt.

(02260.) dar bliben zwênzic brûder tôt

(02261.) und sechse wurden gevangen.

(02262.) sus was der strît ergangen.

(02263.) Kunic Alexander was vrô,

(02264.) daß er den sig behielt alsô.

(02265.) er kârte wider zû lande.

(02266.) er ließ doch dar zû pfande

(02267.) sumelîchen rischen man,

(02268.) der reisen nimmer mêr began.

(02269.) waß brûder in dem strîte was

(02270.) geslagen, dâ ich nû von las,

(02271.) die wurden sider wol verclait

(02272.) mit manchem helde unverzait.

(02273.) die sich durch got hân gegeben

(02274.) in der dûtschen brûdere leben,

(02275.) der ist biß her von jenen tagen

(02276.) vil mancher in gotes dienste geslagen.

(02277.) sie haben ouch mit werenden hant

(02278.) betwungen sider gûte lant,

(02279.) als ûch her nâ wol wirt bekant.

(02280.) nû dise rede ist volant.

(02281.) Meister Herman Balke

(02282.) der was in deme walke

(02283.) mit Rûßen und mit heiden.

(02284.) der mûste er sich beiden

(02285.) mit grôßeme urlouge weren

(02286.) und helfen gotes viende heren.

(02287.) der bischof und des kuniges man,

(02288.) wes er mit den began,

(02289.) daß trûc alleß uber ein

(02290.) als eß an den werken wol schein.

(02291.) daß bûch saget uns vor wâr,

(02292.) daß iß werte sechstehalb jâr

(02293.) daß meister Herman Balke riet.

(02294.) dar nâch er von der werlde schiet.

(02295.) um sîne grôßen arbeit

(02296.) sal im von genâden sîn bereit

(02297.) des himelrîches crône,

(02298.) die gît got im zû lône.

(02299.) Dar nâch wart ein vromer helt

(02300.) zû dûtschen landen ûß irwelt,

(02301.) der hieß brûder Heynrîch.

(02302.) er was sinne und tugende rîch;

(02303.) er was von Heimburc geborn.

(02304.) der wart zû meistere gekorn

(02305.) in daß vor benûmete lant.

(02306.) dar wart er vrôlîchen hin gesant,

(02307.) daß er von des ordenes wegen

(02308.) Nieflandes solde pflegen.

(02309.) dô man zû Nieflande vernam,

(02310.) daß des landes meister quam,

(02311.) man entphienc in sô wol,

(02312.) als man zû rechte den meister sol.

(02313.) war er in die hûs quam,

(02314.) die gunste er gerne von in nam.

(02315.) dô er die hûser wol besach,

(02316.) mit den bischoven er dô sprach,

(02317.) die in den landen wâren.

(02318.) er kunde sô gebâren,

(02319.) daß sie sîn alle wâren vrô.

(02320.) er lebete mit in alsô:

(02321.) wes er von in begerte

(02322.) vil gerne man in gewerte.

(02323.) daß selbe er in wider bôt.

(02324.) war er sach des landes nôt,

(02325.) dar was er willeclîch bereit.

(02326.) er vurchte keine arbeit.

(02327.) anderhalbeß jâr er riet.

(02328.) dar nâch er von dem lande schiet

(02329.) und vûr kein dûtschen landen dô.

(02330.) des wâren die brûdere unvrô.

(02331.) dâ wart er des amtes lôs.

(02332.) Einen brûder man dô kôs,

(02333.) der wart sider wol bekant

(02334.) von wîsheit uber manich lant.

(02335.) er was grôßer tugende rîch.

(02336.) von Grûningen brûder Dŷterîch

(02337.) wart des landes meister dô.

(02338.) er was gotes êre vrô;

(02339.) daß hielt er spâte und vrû.

(02340.) waß sal ûch lange rede nû?

(02341.) dô er zû Nieflande quam,

(02342.) zu meister man in gerne nam.

(02343.) daß wiesten im die brûdere wol,

(02344.) als ich ûch nû sagen sol:

(02345.) alle die gelegenheit

(02346.) wart im gentzlîch geseit.

(02347.) dô er daß alleß wol besach,

(02348.) dar nâch unlange iß geschach,

(02349.) dô wart im wol bekant,

(02350.) daß dannoch in Kûrlant

(02351.) die lûte wâren heiden.

(02352.) daß begunde im sêre leiden.

(02353.) er trûc in sîme hertzen

(02354.) dar umme grôßen smertzen.

(02355.) got der sante in sînen mût,

(02356.) daß sider dem cristentûme wart gût,

(02357.) er wolde heren Kûrlant.

(02358.) den brûderen tet er daß bekant.

(02359.) des wâren sie von hertzen vrô.

(02360.) mit aller macht sie hulfen dô,

(02361.) daß eß wurde vollenbrâcht,

(02362.) als der meister hatte gedâcht.

(02363.) Ein tac wart dô geleit

(02364.) wanne man solde sîn bereit.

(02365.) boten wurden dô gesant

(02366.) nâch Letten und kegen Nieflant.

(02367.) die cristen vûren gerne mit,

(02368.) daß was von alder her ir sit.

(02369.) die bischove und des kuniges man

(02370.) ließ man die reise verstân.

(02371.) die vûren willeclîchen dar

(02372.) mit mancher hovelîchen schar.

(02373.) zû Rîge ir samenunge was.

(02374.) vil manchen helm als ein glas

(02375.) sach man in deme here komen.

(02376.) leitsagen wurden dâ genomen

(02377.) die wol wisten Kûrlant.

(02378.) bie daß mer ûf den strant

(02379.) wart daß her wol geschart

(02380.) nâch mancher banier ûf die vart.

(02381.) daß her was lanc und breit,

(02382.) dâ mit man ordenlîchen reit

(02383.) mit gewalt in Kûrlant.

(02384.) eß gienc in wol dâ in hant.

(02385.) sie santen manche grôße schar

(02386.) in deme lande her und dar,

(02387.) die alle brâchten roubes vil.

(02388.) die rede ich ûch nu kurtzen wil.

(02389.) sie brâchten manchen man in nôt.

(02390.) wer nicht envlôch, der was tôt.

(02391.) die Kûren des wâren unvrô.

(02392.) an einen rât sie vielen dô:

(02393.) sie wolden vridelîchen leben,

(02394.) sie solden sich dem meistere geben.

(02395.) die eldesten sprâchen under in.

(02396.) sie vielen ûf den selben sin

(02397.) und santen boten in daß her.

(02398.) waß sal ich sprechen dâ von mêr?

(02399.) den meister ließen sie verstân,

(02400.) wie ir wille was getân.

(02401.) des wart er von hertzen vrô.

(02402.) er gab in einen vride dô

(02403.) mit der brûdere râte.

(02404.) daß her brach ûf vil drâte

(02405.) und vûr vor einen gûten berc.

(02406.) dâ wart getân ein schône werc,

(02407.) ein êrlîche burc gebûwet wol,

(02408.) der namen ich nû sprechen sol:

(02409.) Goldingen wart die burc genant

(02410.) und liet noch in Kûrlant.

(02411.) dô daß hûs bereitet was

(02412.) rische brûdere man ûß las,

(02413.) die der burc solden pflegen.

(02414.) von knechten manchen vromen degen

(02415.) ließ man dô blîben

(02416.) mit kinderen und mit wîben.

(02417.) der besten Kûren bliben ein teil

(02418.) mit den brûderen ûf ein heil,

(02419.) die andern gâben gîsel dô

(02420.) dem meistere und wâren vrô,

(02421.) daß man sô gûtlîch sie entpfienc.

(02422.) dô der brûdere wille ergienc,

(02423.) daß sich gesatzte daß lant,

(02424.) als ûch daß bûch tût bekant,

(02425.) des was daß her gemeine vrô.

(02426.) sie lobeten got von himele dô

(02427.) unde die liebe mûter sîn:

(02428.) die was ouch dâ ir helferîn.

(02429.) Daß her vûr kegen Rîge wider.

(02430.) die ûf der burc wâren sider

(02431.) aldâ zû Goldingen,

(02432.) mit arbeiten ringen

(02433.) die brûdere mûsten lernen dô

(02434.) in ungemachen wesen vrô

(02435.) durch got von himelrîche.

(02436.) dar nach kurtzelîche

(02437.) Anboten man begreif,

(02438.) dâ von den Kûren vreude entsleit.

(02439.) sie mûsten geben dô den zins.

(02440.) man twinget einen harten vlins,

(02441.) daß er clîben mûß durch nôt:

(02442.) der Kûren bleib vil mancher tôt

(02443.) ê daß lant betwungen wart.

(02444.) beide weich und hart

(02445.) mûste man in legen vor

(02446.) biß daß sie vielen ûf die kor,

(02447.) daß sie den touf entpfiengen,

(02448.) dar zû sie nôte giengen.

(02449.) zû jungest nâmen sie in an sich.

(02450.) Der Littowen kunic rîch

(02451.) Myndowen mûete daß.

(02452.) er trûc den cristen grôßen haß

(02453.) und nam sich dar umme laster an.

(02454.) ein her er samenen began,

(02455.) dâ mit vûr er kegen Kûrlant.

(02456.) den wirt er dâ zû hûse vant,

(02457.) als ich ûch nû sagen sol.

(02458.) Myndowe wânte des wol,

(02459.) daß sîn wille solde irgân.

(02460.) got sîne vrûnt bewaren kan,

(02461.) der kunde ouch die vil wol bewarn,

(02462.) ûf die Myndowe wolde varn.

(02463.) daß was eine burc in Kûrlant,

(02464.) Anboten ist sie genant,

(02465.) dar quam er hin mit grôßer macht.

(02466.) er hette manchen heiden brâcht

(02467.) mit im ûf der brûdere schaden;

(02468.) er wolde den cristentûm verladen.

(02469.) ein wartman daß her besach:

(02470.) mit jagene hette er ungemach

(02471.) biß er zû Goldingen quam.

(02472.) die brûdere er besîten nam.

(02473.) die mêre sagete er in vor wâr.

(02474.) sie achten minner dan ein hâr

(02475.) des liebes oder keiner drô.

(02476.) sie ließen boten rinnen dô

(02477.) nâch al den, die sie mochten hân.

(02478.) die Kûren wolden des nicht lân,

(02479.) sie enwerten kint und wîb

(02480.) ir herren und irs selbes lîb,

(02481.) dar zû burge und lant.

(02482.) den brûderen quâmen sie zû hant

(02483.) mit einer ernsthaften schar.

(02484.) ir hertze stûnt nâch strîte gar,

(02485.) in was der spân gevallen wol,

(02486.) des wâren sie alle sturmes vol.

(02487.) die brûdere wâren ouch des vrô:

(02488.) vil snelle sie sich reiten dô,

(02489.) daß ir wol drîßic wâren.

(02490.) brûder Bernec von Hâren

(02491.) der nam den vanen in die hant,

(02492.) er sprach: “brûdere, sît gemant

(02493.) vil rechte waß der orden sie:

(02494.) blîbet ûweren vanem bie!”

(02495.) Sie hetten wol vumfhundert man,

(02496.) mit den îlten sie von dan

(02497.) bie Anboten in ein holtz.

(02498.) die Littowen quâmen stolz,

(02499.) die wâren dâ mit grôßer macht.

(02500.) vil lûte irschal ir heres bracht.

(02501.) dar quam vil manich heiden stoltz.

(02502.) die brûdere hielden in deme holtz

(02503.) und nâmen rechte ir vûre war.

(02504.) Myndowe hieß die sîne gar

(02505.) ribalde howen;

(02506.) er wolde sie bedrowen

(02507.) die ûf der burc wâren.

(02508.) die kunden ouch gebâren:

(02509.) herteclîchen kein dem her

(02510.) reiten sie sich zû der wer.

(02511.) Myndowe hieß zû sturme gân.

(02512.) dâ sach man manchen heiden stân

(02513.) von den pferden ûf daß gras.

(02514.) den brûderen dar zû liebe was.

(02515.) dô sâhen sie êrst recht ir craft:

(02516.) dâ was vil michel heidenschaft,

(02517.) Myndowe drîßic tûsent man

(02518.) hatte. sturmen er began,

(02519.) er treib sie herteclîchen zû.

(02520.) die brûdere sprâchen: “nicht zû vrû

(02521.) ensprenge wir, daß ist unser vrome,

(02522.) biß ie der man sô nâhe kome

(02523.) dem hûs, daß sie icht wider sehen.

(02524.) gote sal ein êre nû geschehen

(02525.) vor den selben burge hie.”

(02526.) Uß eime holtze riten sie

(02527.) ein lutzel umme durch daß,

(02528.) daß sie die pferde deste baß

(02529.) mochten underrîten.

(02530.) “nû sult ir helde strîten”

(02531.) sprach brûder Bernec, “daß ist recht!

(02532.) eß sie krum oder slecht

(02533.) sô sult ir blîben bie dem vanen.

(02534.) ich enkan ûch anders nicht gemanen

(02535.) dan habet alle lewen mût.”

(02536.) “wir sprengen nû, der rât ist gût.”

(02537.) sie slûgen vrîlîch ûf iren lîb.

(02538.) des clagete sint vil manich wîb

(02539.) zû Littowen, daß ir man

(02540.) sô vrû von dirre werlde entran.

(02541.) die Kûren dâ mit heldes hant

(02542.) werten wol ir selbes lant.

(02543.) sie hulfen Myndowen sô

(02544.) sturmen, daß er wart unvrô:

(02545.) man sach dar manchen walken grôß.

(02546.) die Littowen des verdrôß,

(02547.) sie wêren lieber anderswâ

(02548.) gewesen danne bie in dâ.

(02549.) dâ machten sie sich ûf die vlucht;

(02550.) vil vaste in volgete âne zucht

(02551.) brûder Bernec mit deme vanen.

(02552.) die sînen kunde er wol manen,

(02553.) daß sie sich verjageten nicht:

(02554.) “ist daß, daß er sich wider sicht”

(02555.) sprach er, “daß ist unser tôt.

(02556.) wir varen schône, des ist nôt,

(02557.) und nemen unser lûte war.”

(02558.) daß wart ir aller rât vil gar.

(02559.) den Kûren daß vil wol behaget:

(02560.) sie kêrten wider unverzaget,

(02561.) sie liefen von der burc her abe

(02562.) und nâmen roubes grôße habe.

(02563.) den brâchten sie mit êren hin.

(02564.) dô wart geteilet michel gewin.

(02565.) ûf daß hûs sie ritten dô.

(02566.) die cristen wâren alle vrô.

(02567.) vier brûdere bliben aldâ tôt:

(02568.) des wart gût rât in sulcher nôt.

(02569.) der Littowen vil dar lac

(02570.) bevallen in des tôdes slac

(02571.) vumfzên hundert unde mê.

(02572.) iren vrûnden tet die clage wê.

(02573.) Myndowe hin heim zû lande

(02574.) vlôch. im tet die schande

(02575.) und ouch der schade beide wê.

(02576.) er ensturmete in vumf wochen mê

(02577.) ûf keine burc in Kûrlant.

(02578.) er ließ dâ harte liebe pfant

(02579.) an vrûnden und an mâgen.

(02580.) im dorfte niemant lâgen

(02581.) vor Anboten mêre.

(02582.) er vlôch dô vil sêre,

(02583.) daß im der geist erweret wart.

(02584.) die pfert enwurden nicht gespart

(02585.) biß er zû Littowen quam.

(02586.) der reise er eine mâße nam

(02587.) vor Anboten wol ein jâr;

(02588.) die rede sage ich ûch vor wâr.

(02589.) Die brûdere vûren an gemach.

(02590.) dô gote die êre an in geschach

(02591.) sie lobeten sîne barmherzekeit,

(02592.) die ist manchem armen noch bereit.

(02593.) die Kûren wâren ouch des vrô.

(02594.) sie bliben wert. die brûdere dô

(02595.) hatten manchen kummer grôß,

(02596.) des sie vil lutzel doch verdrôß

(02597.) durch got von himelrîche.

(02598.) sie breiten stêteclîche

(02599.) den gelouben und die rechte ê.

(02600.) in wart dar umme dicke wê.

(02601.) wes hûs in zû mâße was gelegen,

(02602.) der mûste rechter dinge pflegen

(02603.) oder er lac dar umme tôt.

(02604.) sie liden manche harte nôt:

(02605.) sie wachten unde vasten,

(02606.) man sach sie selden rasten.

(02607.) sie hatten michel ungemach.

(02608.) Zû einen zîten iß geschach,

(02609.) daß sie vûren reise.

(02610.) kegen engestlîcher vreise

(02611.) quâmen sie âne wißßenheit.

(02612.) ir viende hatten sich gereit

(02613.) die Littowen mit gewalt.

(02614.) sie brâchten manchen degen balt

(02615.) kegen in in Kûrlant,

(02616.) dâ vient sînen vient vant

(02617.) zû howene ûf dem plâne.

(02618.) die zwei her nâch wâne

(02619.) quâmen kegen einander dô.

(02620.) die Kûren wurden des unvrô,

(02621.) dô sie sie rechte ersâhen.

(02622.) wol zû mâße nâhen

(02623.) wâren sie ungewarnet komen.

(02624.) die setele hatten abe genomen

(02625.) die Littowen ubir al,

(02626.) sie lâgen an gemach zû tal.

(02627.) der heiden was vumftûsent man.

(02628.) die besten von den anderen dan

(02629.) zû dinge wâren abe getân

(02630.) verre von in ûf den plân.

(02631.) die brûdere wâren des gemeit.

(02632.) ir cleine her was wol bereit

(02633.) zû strîtene alle glîche

(02634.) beide arme und rîche.

(02635.) in wart ein zeichen dô gegeben,

(02636.) wie sie in dem strîte solden leben.

(02637.) die dûtschen alle glîche

(02638.) riefen got von himelrîche.

(02639.) die Kûren riefen nâch irem site

(02640.) ir herzeichen vaste mite.

(02641.) sie ranten zû in in daß dinc

(02642.) und slûgen manchen jungelinc,

(02643.) daß er des râtes gar vergaß.

(02644.) wer sunder satel ûf gesaß

(02645.) der envorchte nicht die schande,

(02646.) er envluhe heim zû lande.

(02647.) die brûdere mit der dûtschen schar

(02648.) gedranc mit rîten durch dô vil gar.

(02649.) waß der heiden drête wider

(02650.) die Kûren slûgen sie dâ nider.

(02651.) sie mûsten wîchen durch die nôt.

(02652.) ir her lac mê den halp tôt.

(02653.) die heiden gâben ûf die wer,

(02654.) sie riefen uber al daß her:

(02655.) “der dûtschen macht mit kreften kumet!”

(02656.) dô wart manich heiden hals gedrumet

(02657.) sô daß er ûf der erden lac,

(02658.) der keiner reise mê enpflac.

(02659.) alsus half got den vrûnden sîn.

(02660.) den heiden jêmerlîchen pîn

(02661.) gab der tûvel ûf der stat.

(02662.) wê dem, den er zû gaste bat!

(02663.) Dô des strîtes ende was,

(02664.) dô irbeißeten nider ûf daß gras

(02665.) die brûdere und ir helfer dô.

(02666.) von herzen wâren sie alle vrô.

(02667.) durch recht vergangen was ir zorn,

(02668.) sie hatten niemant dâ verlorn.

(02669.) des wart gelobet Jhêsus Crist,

(02670.) der al der werlde ein lôser ist:

(02671.) er was wol der êren wert.

(02672.) beide wâpen unde pfert

(02673.) die teilte man glîche.

(02674.) gote in himelrîche

(02675.) wart sîn teil behalden.

(02676.) die jungen und die alden

(02677.) ritten heim zû lande

(02678.) mit vreuden sunder schande.

(02679.) daß lant algemeine wart

(02680.) gebeßßert von der herren vart.

(02681.) sie wâren alsô manchen tac,

(02682.) daß man urlouges mit in pflac.

(02683.) sie herten vaste umme sich,

(02684.) tâlanc arm, morne rîch.

(02685.) waß vesten in dem lande lac

(02686.) die pîneten sie nacht unde tac,

(02687.) daß sie sie gewunnen an.

(02688.) geslagen wart vil manich man

(02689.) ûf ietweder sîten,

(02690.) als man pflît in strîten,

(02691.) dô man urlouges pfliget.

(02692.) in wart vil selden an gesiget:

(02693.) got half in selbe in mancher wîs,

(02694.) daß sie behielden wol den prîs.

(02695.) die Littowen herten dar,

(02696.) bie wîlen gulden sie in gar.

(02697.) sie riten wider in ir lant,

(02698.) sie stiften roub unde brant

(02699.) und gulden ir scherf vil wol.

(02700.) bie wîlen gâben sie ouch den zol

(02701.) beide lûte unde gût.

(02702.) sie gußßen beider wege ir blût,

(02703.) daß tâten sie ouch in Nieflant.

(02704.) die mêre sint mir wol bekant.

(02705.) Man saget von dingen, die geschehen,

(02706.) als wir von anderen hôren jehen.

(02707.) ouch ist uns allen vil wol kunt,

(02708.) daß sprichet manches menschen munt

(02709.) von dingen, die in sint bekant.

(02710.) waß wunders dâ zû Nieflant

(02711.) geschehen ist, solde ich eß sagen,

(02712.) ein wagen mûste daß bermît tragen,

(02713.) solde man iß alleß schrîben an,

(02714.) waß got wunders hât getân

(02715.) in Nieflande an der cristenheit.

(02716.) daß was der heidenschaft leit,

(02717.) daß gote sô dicke lob geschach.

(02718.) Myndowen herze in ungemach

(02719.) quam und ander heiden vil,

(02720.) der ich ûch einen nennen wil:

(02721.) Lengewîn was er genant.

(02722.) sîn name ist manchem wol bekant

(02723.) von alder her, ich sage ûch wie.

(02724.) bie sîner zît er nie gelie,

(02725.) sîn hertze was ie sturmes vol;

(02726.) sîn nâkebûr iß dicke wol

(02727.) bevunden. daß was in vil leit.

(02728.) er brâchte mancher hande arbeit

(02729.) den cristen und den heiden zû.

(02730.) wer daß wißßen wolde nû,

(02731.) wâ von er was sô hôchgemût:

(02732.) im was ir hôeste konic vil gût,

(02733.) der hêrre was in Littowen lant:

(02734.) er was Myndowe genant.

(02735.) Lengewîn betrouc sîn ubermût,

(02736.) alsô noch vil manchen tût.

(02737.) er greif drî rische brûdere an,

(02738.) mit den er urlougen began,

(02739.) die dô wâren wol bekant.

(02740.) der eine Tûsche was genant,

(02741.) Milgerîn der ander hieß,

(02742.) der sich in trûwen vinden ließ

(02743.) nâch sîner ê in rechtekeit;

(02744.) im was alle unvûre leit.

(02745.) Gingeike was der dritte name:

(02746.) er endorfte nie gewinnen schame

(02747.) bie sînes mannes sîten,

(02748.) wâ man solde strîten.

(02749.) der helt und ouch die brûdere sîn

(02750.) liden mancher hande pîn.

(02751.) zû dicken stunden eß geschach,

(02752.) daß Lengewînen sach

(02753.) in irme lande mit sînem her.

(02754.) daß widertâten sie mit wer.

(02755.) sie riten wider in sîn lant

(02756.) und stiften roub unde brant.

(02757.) sie triben daß sô manchen tac,

(02758.) daß beider sîten tôt gelac

(02759.) vil manich ungeloubig man.

(02760.) zû jungest Lengewîn gewan

(02761.) den konic Myndowen an sîne schar.

(02762.) der widersaite jegen gar,

(02763.) die ûch von êrsten sint genant.

(02764.) dô in die mêre wurden bekant,

(02765.) daß in Myndowe wolde sschaden,

(02766.) sie sprâchen: “wir sîn verladen.

(02767.) nû prûvet waß daß beste sî.”

(02768.) “die cristen sint uns nâhen bî”

(02769.) sprach der eldeste under in:

(02770.) “wir rîten an den meister hin

(02771.) und nemen dar zû sînen rât.

(02772.) der selbe man vil wîsheit hât;

(02773.) und wil er uns entpfâhen,

(02774.) wir wollen uns genâhen

(02775.) vil gerne zû der cristenheit.

(02776.) sô wir rechen unser leit

(02777.) mit manchem here in daß lant.

(02778.) die stîge sint uns wol bekant.”

(02779.) Milgerîn der helt unverzaget

(02780.) sprach: “sint uns hât widersaget

(02781.) Myndowe, sô moge wir nicht bestân.

(02782.) dar umme sô sulle wir nicht lân:

(02783.) ê wir gerûmen unser lant,

(02784.) wir nemen der heidenschaft ein pfant,

(02785.) daß sie des alle sîn unvrô.”

(02786.) der dritte brûder sprach alsô:

(02787.) “wir hân uns manchen tag gewert:

(02788.) unser lant sint vil verhert.

(02789.) wolle wir behalden unseren lîp

(02790.) und dar zû kinder unde wîp,

(02791.) sô lâße wir uns toufen in gotes namen.”

(02792.) “der dinge sulle wir uns nicht schamen”

(02793.) sprâchen sie alle gemeine dô.

(02794.) Des râtes wâren sie vil vrô

(02795.) die vromen Littowen wert.

(02796.) ir reineß herze doch begert

(02797.) in dem cristentûme.

(02798.) dô hatten sie mit rûme

(02799.) gebrochen kein dem kunige sich;

(02800.) der was grimmes mûtes rîch.

(02801.) sie enmochten nicht blîben,

(02802.) wan sie wolden vertrîben

(02803.) Myndowe unde Lengewîn.

(02804.) dô mochteß anders nicht gesîn,

(02805.) ob sie sich wolden vristen,

(02806.) sie enkêrten zû den cristen.

(02807.) ouch sante in got den sûßen geist

(02808.) von sînen genâden aller meist,

(02809.) daß sie an den meister riten dô.

(02810.) der was der werden geste vrô.

(02811.) ir sache ließen sie in verstân,

(02812.) daß sie den rechten gelouben hân

(02813.) wolden vor die heidenschaft.

(02814.) “uns wil ein kunig mit sîner craft

(02815.) von dem lande trîben.

(02816.) nû lât uns bie ûch blîben,

(02817.) des bitte wir durch ûweren got;

(02818.) wir leisten gerne sîn gebot.

(02819.) wir haben wîb unde kint,

(02820.) die dâ zû hûse bliben sint,

(02821.) und ander vrûnde, wer uns wil

(02822.) volgen, den gebet ouch zil,

(02823.) daß ir die wollet entpfâhen.

(02824.) wir wollen uns gerne nâhen

(02825.) kein ûch und zû der cristenheit.

(02826.) tû wir der heidenschaft leit,

(02827.) daß wir ûch wilkomen sîn.”

(02828.) Der meister sprach: “wir tûn ûch schîn

(02829.) vrûntschaft willeclîche.

(02830.) wir suln ûch machen rîche

(02831.) an êren unde an gûte.

(02832.) ir sult un unser hûte

(02833.) sîn und wer mit ûch wirt brâcht.

(02834.) ir habet des besten ûch bedâcht.”

(02835.) dô sprâchen die ellenden:

(02836.) “wir suln zû lande wenden.

(02837.) leit uns got âventûre hân,

(02838.) iß wirt vil wol kunt getân.

(02839.) wir danken ûch vlîßlîche,

(02840.) daß ir sô tugentlîche

(02841.) uns, hêrre meister, entpfangen hât.

(02842.) unser sorgen wirt gût rât:

(02843.) wil uns got daß leben lân,

(02844.) unsen dienst sult ir hân,

(02845.) wir wollen mit hulde kêren

(02846.) zû lande mit disen mêren

(02847.) die wir von ûch vernomen hân.”

(02848.) von dannen schîden sie dan.

(02849.) Dô sie quâmen in ir lant,

(02850.) die mêre tâten sie bekant

(02851.) vrûnden unde mâgen.

(02852.) zû hant sie begunden lâgen

(02853.) dem stoltzen Lengewîne.

(02854.) ich wêne daß Milgerîne,

(02855.) Gingeike unde Tûsche

(02856.) giengen wol zû brûsche

(02857.) in Lengewînes lande,

(02858.) biß daß sie got selbe sande,

(02859.) dâ sie im quâmen sô nâhen,

(02860.) daß sie in mit ougen sâhen:

(02861.) des wurden sie von herzen vrô.

(02862.) nicht lenger sûmeten sie dô,

(02863.) Lengewîn der wart gehurt

(02864.) als er hette ungegurt

(02865.) ûf daß pfert geseßßen.

(02866.) sîner hêrschaft wart vergeßßen.

(02867.) ich weiß wol, daß er nicht enslief.

(02868.) Milgerîn sînen brûderen rief:

(02869.) “nû brenget eine lînen,

(02870.) daß wir Legewînen

(02871.) uns machen wol zû mâßen.”

(02872.) daß enwart ouch nicht gelâßen:

(02873.) Lengewîn wart gebunden

(02874.) zû den selben stunden,

(02875.) daß im daß lachen gar vergienc.

(02876.) des habe er danc, der in dô vienc!

(02877.) dô was Lengewîn sô clûc,

(02878.) daß er ûf dem rucke trûc

(02879.) sîne hande beide:

(02880.) des dâchte er im vil leide.

(02881.) Dô diß was irgangen,

(02882.) Lengewîn gevangen

(02883.) wart gevûrt vil drâte

(02884.) mit eime snellen râte

(02885.) hin in Milgerînes lant.

(02886.) Tûsche sprach al zû hant:

(02887.) “hie ensal niemant sûmen nû!

(02888.) wer mînen willen wolle tû

(02889.) der volge uns rasch von hinnen.”

(02890.) sîne mâge wol mit sinnen

(02891.) antwurten im der rede dô:

(02892.) “der verte sie wir alle vrô.”

(02893.) sus hûben sie sich ûf die vart.

(02894.) der pferde wart dô nicht gespart:

(02895.) sie ritten beide nacht und tac,

(02896.) daß ir kein nie rûwe pflac.

(02897.) die wib und ouch die kinder,

(02898.) ochsen unde rinder

(02899.) und alleß daß sie hâten

(02900.) triben sie kein Aschrâten

(02901.) in einen wunneclîchen walt

(02902.) dâ nam die stoltze schar behalt.

(02903.) ir volc sie blîben ließen dâ

(02904.) und ritten an den meister sâ

(02905.) und sûchten aber sînen rât.

(02906.) sie sprâchen: “hêrre, ob uns got hât

(02907.) ein pfant gegeben, wollet ir uns daß

(02908.) behalden? wir mogen deste baß

(02909.) alhîr mit ûch blîben

(02910.) mit kindern und mit wîben.”

(02911.) “nû saget, stoltzen helde gût,

(02912.) und lât uns wißßen ûweren mût:

(02913.) waß pfandes habet ir brâcht?”

(02914.) sie sprâchen harte wol bedâcht:

(02915.) “dâ hân wir Lengewînen

(02916.) gebrâcht an einer lînen.”

(02917.) der meister sprach: “des wêre ich vrô.

(02918.) wêr ûwer ding gevallen sô,

(02919.) hettet ir alle die heidenschaft

(02920.) die besten hie mit ûwer craft

(02921.) gevangen unde gebunden,

(02922.) die brûdere wol des ûch gunden,

(02923.) daß ir die satztet ûf ir recht.”

(02924.) “daß sage wir ûch, die rede ist slecht.”

(02925.) “nû tût daß wir ûch râten

(02926.) und rîtet vollen drâten

(02927.) und brenget uns den selben man,

(02928.) der ûch sô vil hât getân

(02929.) grôßes widermûtes.

(02930.) wen ir getrûwet gûtes

(02931.) uns brûderen allen glîche,

(02932.) daß wißßet sicherlîche,

(02933.) wir entûn ûch keinen wanc,

(02934.) ir sullet haben immer danc,

(02935.) daß ir sô menlîchen hât

(02936.) geworben nû mit dirre tât.”

(02937.) Sie danketen alle glîche dô

(02938.) dem meistere unde wâren vrô

(02939.) und ritten dannen drâte

(02940.) hin kein Aschrâte

(02941.) in den vor genanten walt,

(02942.) dâ ir gesinde hatte behalt.

(02943.) dô vunden dâ die helde gût

(02944.) alle die vil wol behût,

(02945.) die sie hatten dâ gelân.

(02946.) des dankten sie gote von himele sân.

(02947.) sie wâren mit einander vrô

(02948.) die nacht biß zû dem morgen dô.

(02949.) dô der morgen ane brach

(02950.) unde den tac man kûme sach,

(02951.) sie nâmen Lengewînen

(02952.) dô er lac in den pînen,

(02953.) und vûrten in zû Rîge zû hant.

(02954.) der meister, als iß was gewant,

(02955.) entpfienc sie lieplîchen dô.

(02956.) er machte sie alle gemeine vrô

(02957.) mit grûße und mit stifte.

(02958.) er gab in ouch mit schrifte

(02959.) beide lûte unde lant.

(02960.) daß wart sider manchem bekant.

(02961.) Der meister Lengewînen nam

(02962.) gevangen als im gezam;

(02963.) des was er von herzen vrô.

(02964.) er warb umme eine reise dô

(02965.) zû Littowen ûf die heidenschaft;

(02966.) er wolde dâ hin mit grôßer craft.

(02967.) des kuniges man wurden ouch bereit

(02968.) von Revele, dô in wart geseit;

(02969.) sie vûren willeclîchen dar.

(02970.) dô ir der meister wart gewar,

(02971.) der lieben geste wart er vrô;

(02972.) er entpfienc sie lieplîchen dô.

(02973.) Letten nâch irme alden site

(02974.) und Lîven vûren gerne mite.

(02975.) Tûsche und ouch die brûdere sin

(02976.) die tâten dicke trûwe schîn

(02977.) wâ man ir dorfte zûr der nôt,

(02978.) ie der man sich selber bôt.

(02979.) zû mancher hande vromekeit

(02980.) ir stêteß hertze was bereit.

(02981.) Dô daß her bereitet wart

(02982.) der meister hûb sich ûf die vart.

(02983.) die nûwen cristen vûren mite,

(02984.) sie westen wol des landes site.

(02985.) sie wâren zû den cristen komen

(02986.) und hatten an sich den touf genomen

(02987.) mit allen irme gesinde gar.

(02988.) sint stûnden sie an der cristen schar.

(02989.) dô man uber die Dune quam,

(02990.) ie der vane sîne rote nam

(02991.) ordenlîchen ûf die wege

(02992.) und hielden die in stêter pflege

(02993.) durch brûch und manchen bôsen walt.

(02994.) die lant sint alsô gestalt,

(02995.) dâ ist ouch manche bôse bach.

(02996.) sie liden michel ungemach.

(02997.) zû jungest quâmen sie dâ hin;

(02998.) daß wart vil manches ungewin.

(02999.) sie brâchten manchen man in nôt:

(03000.) der nicht vlôch, der lac dâ tôt.

(03001.) sie herten umme sich die lant.

(03002.) in Lengewînes hof quam gerant

(03003.) Gingeike mit einer grôßen schar.

(03004.) dar nâch daß her quam alleß dar

(03005.) und lâgen dâ die selbe nacht.

(03006.) sie hatten roubes vil dar brâcht.

(03007.) des anderen morgens reit man dô

(03008.) kein Rîge. daß her was alsô vrô,

(03009.) sie wâren beider sît behût,

(03010.) ir afterhûte die was gût.

(03011.) dô quâmen Littowen ûf gerant.

(03012.) sie kârten wider al zû hant.

(03013.) waß sal ich ûch mêr dâ von sagen?

(03014.) Lengewines brûder wart geslagen,

(03015.) die anderen vlohen zû brûche wert.

(03016.) in wart genomen manich pfert;

(03017.) daß was in leit und ungemach.

Saturs

Ðîs sadaïas teksta tulkojums latvieðu valodâ (02017.-03013.rinda)

Iepriekðçjâ sadaïa vidusaugðvâcu valodâ (01005.-02016.rinda)

Nâkamâ sadaïa vidusaugðvâcu valodâ (03018.-04030.rinda)

HISTORIA.LV