Saturs

Ðîs sadaïas teksta tulkojums latvieðu valodâ (05007.-06026.rinda)

Iepriekðçjâ sadaïa vidusaugðvâcu valodâ (04031.-05008.rinda)

Nâkamâ sadaïa vidusaugðvâcu valodâ (06027.-07058.rinda)

Livlädische Reimchronik (05009.-06026.)

(05009.) Binnen des daß daß geschach

(05010.) die lesten wartlûte man sach,

(05011.) stoltze helde ûß irlesen,

(05012.) die bie dem here wâren gewesen.

(05013.) den cristen wart dô kunt getân,

(05014.) wie die heiden einen plân

(05015.) mit irme here verdecketen gar.

(05016.) ouch was man wurden gewar

(05017.) mancher brunjen wunneclîch.

(05018.) ir helme wâren von golde rîch,

(05019.) eß lûchte alsam ein spîgelglas.

(05020.) waß gesmîdes an in was,

(05021.) daß schein alleß silbervar.

(05022.) sie wurden mancher rotte gewar,

(05023.) die herten und branten.

(05024.) waß sie der lûte beranten

(05025.) die wurden gevangen und geslagen.

(05026.) alsus hôrte man die wartlûte sagen.

(05027.) dô der meister diß vernam,

(05028.) mit der brûdere râte er quam

(05029.) kein einer burc, die hieß Warchdach.

(05030.) sîn her reit schône vor und nâch.

(05031.) man sach sie ordenlîchen varn.

(05032.) er wolde den cristentûm bewarn.

(05033.) an beiden sîten wol bewart

(05034.) daß her was ouch zû wer geschart.

(05035.) die von der burge wurden dô

(05036.) des heres und der brûdere vrô.

(05037.) ir mût was getrôstet gar,

(05038.) dô sie des meisteres wurden gewar.

(05039.) Bie daß hûs ûf ein velt

(05040.) die cristen slûgen schône ir gezelt

(05041.) ûf ein wunneclîcheß gras.

(05042.) waß brûdere ûf dem hûse was,

(05043.) der quam ein teil mit ir schar.

(05044.) der meister wart zû râte aldar:

(05045.) er wolde des morgens strîten,

(05046.) man solde nicht lenger bîten,

(05047.) wâ man die heiden mochte an komen,

(05048.) eß gienge an schaden oder an vromen.

(05049.) dô der rât irgangen was,

(05050.) ein teil man rischer lûte ûß las

(05051.) und machte zwû rotte, die wâren gût.

(05052.) von der einen wart behût

(05053.) daß her biß ûf den anderen tac.

(05054.) sîn oberste hûte an gote lac

(05055.) der alle ding berichten sol.

(05056.) er behûte die cristen ouch dâ wol.

(05057.) die andere schar wart dâ gesant,

(05058.) wie iß um die heiden wêre gewant.

(05059.) die ritten hin vil drâte.

(05060.) eß was des âbendes spâte.

(05061.) vil schiere wurden sie gewar

(05062.) der Lettowen eine gevûge schar.

(05063.) sie wâren gewesen ûf der bach,

(05064.) dâ man der cristen spor besach.

(05065.) sie hetten die vil wol besehen,

(05066.) dar an in leide was geschehen:

(05067.) von hertzen was in ungemach.

(05068.) ir einer zû dem anderen sprach:

(05069.) “sie wollen rechen iren schaden

(05070.) und hân den meister ûß geladen.”

(05071.) dô sprach ein ander, der reit dâ bie:

(05072.) “ich wêne zû Nieflande nieman sie

(05073.) zû hûse bliben, des hân ich wân,

(05074.) als ich mich an dem pfade verstân:

(05075.) wir suln uns nicht sûmen nû.”

(05076.) “die nacht die gêt uns vaste zû,”

(05077.) sprach ein Lettowe, der was clûc,

(05078.) “ich wêne, wir haben geheret genûc.

(05079.) waß wir haben hie gesehen

(05080.) daß sal man al dem here verjehen.”

(05081.) sie manten ein wênic baß ir pfert

(05082.) die richte kein irme here wert.

(05083.) daß sie nicht wurden an gerant,

(05084.) ich sage ûch, wie daß was gewant,

(05085.) von den cristen zû der stunt.

(05086.) sie hinderte ein vil tiefer grunt.

(05087.) dâ wêren sie wol uber komen,

(05088.) îdoch hetteß in die nacht genomen.

(05089.) zû jungest quâmen sie ûf ir spor.

(05090.) die Lettowen drabeten vaste vor,

(05091.) sô schiere sie quâmen in daß her.

(05092.) waß sol ich sprechen dâ von mêr?

(05093.) die mêre tâten sie in bekant.

(05094.) vil schiere boten wurden gesant

(05095.) von irme konige uber al daß her

(05096.) und tâten daß in stiller wer.

(05097.) sie quâmen zû samne an einen rât,

(05098.) jene Lettowen man sagen bat,

(05099.) waß sie hetten dâ vernomen.

(05100.) die von der slâ wâren komen

(05101.) die sprâchen alle vil wol bedâcht:

(05102.) “ein her ist von der Dune brâcht,

(05103.) daß hât ein vil breiteß pfat,

(05104.) eß tût uns Lettowen allen mat.

(05105.) hettet ir ir wege als wir gesehn,

(05106.) ir hulfet uns der wârheit jehn.

(05107.) unser gote mogen uns helfen wol,

(05108.) den man vil wol getrûwen sol:

(05109.) sie kunnen dar zû vil wol vromen,

(05110.) daß wir gesunt von hinnen komen.”

(05111.) Dô sie ir rede gehôrten,

(05112.) vil schiere mit kurtzen worten

(05113.) berichten sie iß under in,

(05114.) daß sie kein Lettowen vûren hin.

(05115.) mit jagene in vil wê geschach

(05116.) die nacht. sie hatten ungemach

(05117.) ê dan sie quâmen durch den hagen.

(05118.) nicht lange dar nâch begundeß tagen.

(05119.) waß an den heiden was geschehn

(05120.) daß hatten die cristen wol gesehn.

(05121.) sie hielden dâ bie ûf einer bach

(05122.) alsô daß man ir nicht ensach.

(05123.) sie sâhen daß her hin wec zogen,

(05124.) ir hertze wânte sîn betrogen.

(05125.) sie sprâchen: “schiere komen gerant

(05126.) die Lettowen, dâ sie haben gebrant

(05127.) sie wollen daß lant betriegen.

(05128.) wolle wir nû nicht liegen,

(05129.) sô mûße wir nâch in in den hagen,

(05130.) daß wir die mêre wider sagen,

(05131.) wô die Lettowen kêren hin

(05132.) und ob zû lande stê ir sin.

(05133.) daß sulle wir alleß wol besehn,

(05134.) sô moge wir der wârheit jehn.”

(05135.) Waß sal ûch mêr dâ von gesaget?

(05136.) sie wâren helde unverzaget.

(05137.) nicht lenger wart von in gespart,

(05138.) nâch den Lettowen ûf die vart

(05139.) hûben sich die dûtschen dô.

(05140.) in was die warte bevoln sô:

(05141.) sie ensolden nimmer wider komen

(05142.) ê dan sie hetten wol vernomen

(05143.) waß sie dem meistere solden sagen.

(05144.) dô sie quâmen durch den hagen,

(05145.) sie sâhen wol die wârheit,

(05146.) daß daß her kein Lettowen reit.

(05147.) niekein schar geleite sich nider

(05148.) ê dan sie quâmen zû hûse wider.

(05149.) nicht lenger sûmeten sie dô,

(05150.) der brûdere wartlûte wâren vrô.

(05151.) ir oberste under in ûß las,

(05152.) wer aller best geriten was,

(05153.) den ließ er kein der burge jagen.

(05154.) er solde dem meistere alsô sagen:

(05155.) die Lettowen wêren hin wec,

(05156.) sie sûchten brucken noch den stec

(05157.) und vlohen rechte als die zagen,

(05158.) man kunde sie nimmer mê abe jagen,

(05159.) sie hetten den wec sô verre vor,

(05160.) daß sêhe man wol an irme spor,

(05161.) sie nêmen keine legirstat.

(05162.) den boten er sus sagen bat.

(05163.) Der bote sûmete sich nicht mêr.

(05164.) gerichte kein der brûdere her

(05165.) hûb er sich ûf die vart.

(05166.) der wec wart dô nicht gespart.

(05167.) dô er den meister an gesach,

(05168.) nâch grûße er im der botschaft jach,

(05169.) wie iß um die heiden wêre gestalt.

(05170.) er sprach: “sie sint durch den walt.

(05171.) ich wil ûch die wârheit sagen,

(05172.) die Lettowen kan kein her abe jagen.”

(05173.) dô der meister hatte gehôrt

(05174.) des boten rede biß ûf daß ort,

(05175.) mit snellem râte er des nicht ließ,

(05176.) nâch den brûderen sân er hieß

(05177.) knechte îlen durch daß her.

(05178.) sie quâmen schiere mit ir wer.

(05179.) dô die brûdere wâren quomen,

(05180.) waß der meister hatte vernomen

(05181.) von dem boten an der stunt,

(05182.) daß tet er al den brûderen kunt.

(05183.) er sprach: “nû gebet uns ûwern rât,

(05184.) sint uns got er gesendet hât.”

(05185.) dô sie hetten vernomen,

(05186.) daß die Lettowen wâren komen

(05187.) sô verre ûß deme lande,

(05188.) eß endûchte sie keine schande,

(05189.) daß man sie rîten ließe.

(05190.) sie sprâchen, daß man hieße

(05191.) daß her sich albereiten sân,

(05192.) man solde lâßen sie verstân,

(05193.) von weme die botschaft wêre komen.

(05194.) “wanne sie die haben vernomen,

(05195.) sô sul wir sûchen iren rât.

(05196.) vor wâr, eß ist kein missetât.”

(05197.) Dô die rede irgangen was,

(05198.) ûf ein wunneclîcheß gras

(05199.) hieß man die wîsten alle komen.

(05200.) die dûtschen wurden mite genomen.

(05201.) dô ließ der meister sie verstân,

(05202.) wieß um die heiden wêre irgân.

(05203.) er sprach: “die Lettowen sint hin wec,

(05204.) sie ensûchten brucken noch den stec

(05205.) und vlohen sêre durch den hagen;

(05206.) man kunde sie nimmer abe jagen.

(05207.) daß hôrte wir die wartlûte jehn,

(05208.) die haben die wârheit wol gesehn.

(05209.) waß ûwer wille sie dar an,

(05210.) daß lâßet snelle uns verstân.”

(05211.) sie dankten dem meistere dô,

(05212.) sie sprâchen: “hêrre, wir sîn vrô,

(05213.) daß ûch got hât er gesant.

(05214.) haben uns die Lettowen daß lant

(05215.) gerûmet vor, sô lâßet sie varn,

(05216.) wir wollenß in her nâch sparn,

(05217.) wanne eß uns baß gevallen mac.

(05218.) got gebe den heiden sînen slac!”

(05219.) die brûdere gâben dô den rât,

(05220.) man solde ûf der selben stat

(05221.) wider kein der Dune varn.

(05222.) Kûrlant solden bewarn

(05223.) die man dar inne ließe,

(05224.) und wen der meister hieße

(05225.) der solde dâ blîben. diß geschach.

(05226.) daß her algemeine ûf brach.

(05227.) der meister und die brûdere sîn,

(05228.) daß was ouch ein teil pilgerîn

(05229.) und wer mit dar komen was,

(05230.) sîn her besunder er ûß las.

(05231.) die kêrten kein der Rîge zû.

(05232.) dar quâmen sie eines morgens vrû.

(05233.) sie wurden wol entpfangen.

(05234.) sus was die reise irgangen.

(05235.) sie lâgen dâ sô manchen tac,

(05236.) daß ir mûde wol gelac

(05237.) und ouch gerestet wâren ir pfert.

(05238.) dô ritten sie kein lande wert.

(05239.) Nicht lange dar nâch iß geschach,

(05240.) daß man die Semegallen sach

(05241.) gân an einen bôsen rât,

(05242.) den sie volvûrten mit der tât

(05243.) alsô, daß sie verkêrten sich,

(05244.) doch ein teil hovelîch.

(05245.) den vogeten ließen sie alle ir habe.

(05246.) eß was ein vromer helt, hieß Schabe,

(05247.) der riet den Samegallen,

(05248.) daß sie den vogeten allen

(05249.) ennêmen keiner hande gût;

(05250.) man solde sie lâßen wol behût

(05251.) rîten ûß dem lande wider.

(05252.) sus solden sie den vride nider

(05253.) mit den cristen legen sô.

(05254.) des râtes wurden sie alle vrô,

(05255.) den in Schabe hatte getân.

(05256.) nâch den worten sante man sân,

(05257.) wâ man sie in deme lande vant.

(05258.) vil schiere quâmen dâ gerant

(05259.) die vogete von Semegallen.

(05260.) man kundeteß in allen:

(05261.) sie solden ûß dem lande varn.

(05262.) ouch hieß man sie daß wol bewarn,

(05263.) daß sie icht quêmen in daß lant.

(05264.) sie vûren kein Rîge zû hant

(05265.) und saiten wie iß in was ergân.

(05266.) der meister nam die brûdere sân,

(05267.) die zû Rîge hôrten zû.

(05268.) er sprach: “brûdere, râtet nû,

(05269.) ob wir die kummentûre lân

(05270.) und die vogete diß verstân,

(05271.) daß sie zû uns komen her.”

(05272.) die brûdere sprâchen: “unser ger

(05273.) ist sô zû disen zîten:

(05274.) tag und nacht lât rîten

(05275.) kein Segewalt und kein Eistlant;

(05276.) zû Aschrâten sendet ouch zû hant.”

(05277.) die boten ritten ungespart

(05278.) nâch den vogeten ûf die vart

(05279.) und nâch den kummentûren algemein.

(05280.) sie quâmen des schiere uber ein,

(05281.) dô die botschaft in wart bekant:

(05282.) sie vûren kein der Rîge zû hant.

(05283.) dô sie der meister an gesach,

(05284.) nâch grûße er lieplîchen zû in sprach:

(05285.) “wir sullen gân an einen rât:

(05286.) Semegallen sich verkêret hât.”

(05287.) Der meister dô die brûdere nam

(05288.) al zû samne, als eß im gezam,

(05289.) waß ir kegenwurtic was.

(05290.) die wort er sunder brief in las

(05291.) von den Semegallen,

(05292.) wie sie den vogeten allen

(05293.) hetten urloub gegeben

(05294.) und wolden sunder vride leben.

(05295.) er bat sie geben rât dar zû.

(05296.) sie sprâchen: “meister, bûwet nû

(05297.) ein hûs zû in in ir lant:

(05298.) sie komen schiere in ûwere hant.”

(05299.) der meister quam des uber ein

(05300.) mit den brûderen algemein.

(05301.) er wolde bûwen in daß lant

(05302.) des nêhesten winters al zû hant.

(05303.) nicht lange nâch dem râte

(05304.) ie der man vil drâte

(05305.) snelle hin zû hûse reit.

(05306.) dar nâch des winters wart gereit

(05307.) alleß daß man solde hân.

(05308.) der meister hette ouch nicht gelân,

(05309.) waß bischove in dem lande was,

(05310.) ir keinen er besîte las,

(05311.) er wolde ir aller helfe nemen.

(05312.) der bete endorfte er sich nicht schemen,

(05313.) sie tâten willeclîchen gar.

(05314.) alle ir vogete quâmen dar

(05315.) zû Rîge, dô manß in gebôt.

(05316.) sie wâren vrô und lobeten got,

(05317.) daß sie kein Semegallen

(05318.) durch got solden wallen.

(05319.) die von Revele quâmen dô

(05320.) des kuniges man und wâren vrô,

(05321.) daß sie solden reise varn.

(05322.) von Jerwen dorfte man nicht sparn

(05323.) niemant zû der selben nôt:

(05324.) sie quâmen, dô manß in gebôt.

(05325.) von Sackele und von der Pâle

(05326.) die quâmen al zû mâle.

(05327.) waß dâ reise mochte varn,

(05328.) Lîven, Letten, mit ir scharn

(05329.) vûren kein der Rîge zû.

(05330.) dar quam daß her zû mâßen vrû

(05331.) von den landen, daß ist wâr.

(05332.) man entpfienc sie lieplîchen gar

(05333.) nâch ir aller werdekeit.

(05334.) der meister selbe zû in reit

(05335.) und schûf den gesten gût gemach.

(05336.) in grôßer liebe daß geschach.

(05337.) Des anderen morgens der meister nam

(05338.) ein teil brûdere unde quam

(05339.) zû den, die dâ wâren komen

(05340.) durch der cristenheite vromen

(05341.) und durch irre sêle heil.

(05342.) er nam der besten ûß ein teil

(05343.) und sprach in gûtlîchen zû:

(05344.) “ir hêrren, gedenket nû,

(05345.) daß wir den vienden tûn ein leit.

(05346.) hier ist alleß daß bereit,

(05347.) daß man zûr spîse haben sol

(05348.) zû einer burg; daß hân ich wol

(05349.) vollenclîch zû samne brâcht.

(05350.) geschiet iß, als ich hân gedâcht,

(05351.) sô wolle wir bûwen in daß lant,

(05352.) daß Semegallen ist genant.

(05353.) dar gere ich ûwer hulfe zû,

(05354.) daß ir wollet râten nû,

(05355.) wie die spîse mit uns kome.”

(05356.) dô sprach ein ritter, der was vrome:

(05357.) “meister, hie sint vil slitten

(05358.) beide der Lîven und der Litten

(05359.) und ouch dar zû der Eisten:

(05360.) den minnesten und den meisten

(05361.) gebe man vil glîch ir teil,

(05362.) sint dar an sô grôß heil

(05363.) liget, als ir gesaget hât.”

(05364.) dem meister was vil lieb der rât.

(05365.) zû hant die spîse geteileit wat.

(05366.) dâ mite hûb sich ûf die vart

(05367.) daß her kein Semegallen.

(05368.) vreude was mit in allen,

(05369.) die mit dem meistere wâren komen,

(05370.) der Kûren banier wart vernomen,

(05371.) die mit ir here in stoltzer var

(05372.) zû der reise kômen dar.

(05373.) des vreute sich des meisteres mût

(05374.) und ouch der rischen rittere gût.

(05375.) Dô sie quâmen ûf daß velt

(05376.) zû Terweten, manich gezelt

(05377.) wart dâ vrôlîch ûf geslagen.

(05378.) die Semegallen wâren nicht zagen,

(05379.) sie werten graben und ir tor

(05380.) die wîle die cristenheit dâ vor

(05381.) lac vil vromen helden glîch.

(05382.) doch wurden ebenhôe rîch

(05383.) gebûwet und zû getriben.

(05384.) ein crankeß hertze mûste erbiben,

(05385.) hette eß mit ougen an gesehn,

(05386.) sô ich der wârheit sol verjehn.

(05387.) man treib sie vaste ûf den graben.

(05388.) zû hant ein sturm wart erhaben,

(05389.) der was michel unde grôß.

(05390.) vil manchen sêre des verdrôß.

(05391.) der sturm der werte einen tac,

(05392.) sperwechsels vil man dâ pflac.

(05393.) dâ schôß man Semegallen gnûc,

(05394.) daß man sie tôt von dannen trûc.

(05395.) dô sie gesturmet hâten

(05396.) gemeine sie abe trâten,

(05397.) die von der burge trâten nâch,

(05398.) nâch den cristen was in gâch.

(05399.) sie schußßen vitzern und sper,

(05400.) die cristen hin, die heiden her.

(05401.) dâ mite kârten sie sider

(05402.) ûf ir burc rasche hin wider.

(05403.) der brûdere her zû hant ûf brach,

(05404.) dô eß den liechten morgen sach.

(05405.) und vûr vorder in daß lant.

(05406.) dâ bûwete man al zû hant

(05407.) ein hûs, daß hießen sie Dobên.

(05408.) Terweten ließen sie stên.

(05409.) Der meister was des hûses vrô;

(05410.) er besatzte iß alsô,

(05411.) als eß im wol gezam.

(05412.) die spîse man dô alle nam,

(05413.) die mit der reise was gebrâcht,

(05414.) als meister Burkart hatte gedâcht,

(05415.) und brâchte sie in die vesten.

(05416.) sint las er ûß die besten

(05417.) und die raschesten brûdere sîn.

(05418.) er sprach: “ir sult hie gerne sîn

(05419.) durch got und durch des ordens vromen.”

(05420.) zû hant knechte wurden genomen,

(05421.) die dar zû quâmen rechte

(05422.) (eß wâren rasche knechte),

(05423.) und beval in allen daß,

(05424.) daß sie zûr were nicht wêren laß.

(05425.) armbruste und pfîle

(05426.) wart in kurtzer wîle

(05427.) ûf die burc gebrâcht alsô,

(05428.) daß sie des alle wurden vrô.

(05429.) dâ wurden graben ouch gegraben

(05430.) und rinneboume erhaben.

(05431.) dar mite der meister vûr von dan.

(05432.) er hatte manchen rischen man.

(05433.) die Kûren mit urloube dô

(05434.) zû lande vûren alle vrô.

(05435.) der meister mit den sînen reit

(05436.) zû Rîge wider; er was gemeit.

(05437.) der meister die von Revele nam

(05438.) zuchteclîch, als iß im gezam,

(05439.) zû Rîge an der widervart.

(05440.) nichtes nicht wart dâ gespart,

(05441.) er pflac ir lieplîch und wol,

(05442.) als man werder geste sol.

(05443.) die rittere von Revele dô

(05444.) zû lande ritten harte vrô.

(05445.) Die Lettowen al zû hant,

(05446.) die Sameiten sint genant,

(05447.) quâmen vor Dobênen stoltz,

(05448.) als von eime armbruste ein holtz.

(05449.) sie quâmen mit einer rischen schar,

(05450.) ir brunjen wâren silbervar.

(05451.) sie vûren sêre mit gewalt,

(05452.) sie hatten manchen degen balt

(05453.) zû schadene den von Dobên.

(05454.) sie mûsten dâ zû sturme gên.

(05455.) die brûdere wâren nicht zû laß,

(05456.) sie schenketen baß unde baß

(05457.) iren gesten, die dar wâren komen.

(05458.) die heiden hatten keinen vromen

(05459.) des schenkens, des man in dô pflac.

(05460.) vil manich man dâ nider lac,

(05461.) der vor daß hûs quam gerant.

(05462.) ûf hôr sie trâten al zû hant.

(05463.) geschenket wart in sô genûc,

(05464.) daß man sie tôt von dannen trûc.

(05465.) got von himele bewarte dô

(05466.) die brûdere ûf der burc alsô

(05467.) und ir knechte uber al,

(05468.) daß dâ in ir aller zal

(05469.) nie dekeiner tôt gelac

(05470.) noch keiner hande smertzen pflac.

(05471.) zû hant die heiden kârten hin

(05472.) zû lande. cleine was ir gewin.

(05473.) ir tôten vûrten sie von dan.

(05474.) sie hatten manchen cranken man,

(05475.) der dâ sô gewundet was,

(05476.) daß er der wunden nicht genas:

(05477.) der sanc vil jêmerlîchen sanc.

(05478.) vor Dobên in alsô gelanc.

(05479.) Dô man begunde bûwen

(05480.) Dobên des sult ir getrûwen,

(05481.) dô was der winter harte kalt.

(05482.) sint dô die blûmen manichvalt

(05483.) ûß der erden drungen

(05484.) unde die vogelîn sungen,

(05485.) daß was nâch ôstern, zû hant

(05486.) der meister bôt in sîne lant,

(05487.) daß sie der burge nêmen war

(05488.) mit trûwen und mit vließe gar.

(05489.) die brûdere wâren des vil vrô,

(05490.) lieplîchen sprâchen sie dô:

(05491.) “wir wollen gerne durch got

(05492.) und durch ûwer gebot

(05493.) unsern liep hie wâgen.

(05494.) dâ vor wolle wir nicht trâgen.”

(05495.) die brûdere wurden dâ gelân.

(05496.) ir aller oberste reit sân

(05497.) vaste kein der Dune wart

(05498.) mit sîme here ûf die vart

(05499.) und quam zû Rîge wider.

(05500.) sîn her zû lande kârte sider.

(05501.) den Lettowen ir gemûte

(05502.) bran in zornes glûte,

(05503.) daß alsô vermeßßen

(05504.) die brûdere wâren geseßßen

(05505.) bie in, âne vorewort.

(05506.) sie sprâchen: “hât uns der mort

(05507.) mit disen gesten uberladen,

(05508.) die uns allen enden schaden!

(05509.) wir wollen in manchen stucken

(05510.) in die vederen pflucken.”

(05511.) Zû hant ein her bereitet wart

(05512.) der Lettowen ûf die vart

(05513.) zû Karschowen drâte.

(05514.) dâ bûweten sie mit râte

(05515.) eine starke burc dâ vor.

(05516.) sie sûchten dicke vor daß tor,

(05517.) wi die brûdere mochten,

(05518.) ob sie zûr were icht tochten.

(05519.) daß wart in widergolden

(05520.) alsô gar unholden:

(05521.) daß tâten wol mit rechte

(05522.) die brûdere und ir knechte.

(05523.) sperwechsels vil man dâ vant.

(05524.) man sach dâ manche rische hant

(05525.) von ir beider sîten.

(05526.) sie wûchzeten und schrîten

(05527.) und schußßen vaste ir sper.

(05528.) eß was vil wol ir aller ger,

(05529.) daß ir ein dem anderen tête nôt

(05530.) unde brêchte im den tôt.

(05531.) daß trieben sie endelîche

(05532.) vrû unde spâte glîche

(05533.) zwischen disen burgen zwein.

(05534.) al die wîle wart in ein

(05535.) der meister, daß er wolde varn,

(05536.) sîne brûdere bewarn,

(05537.) die zû Karschowen wâren bliben.

(05538.) brîve wurden dâ geschriben

(05539.) vaste hin zû Eistlant.

(05540.) ir helfe quam im al zû hant.

(05541.) Under disen dingen,

(05542.) daß nicht misselingen

(05543.) dorfte der reinen cristenheit,

(05544.) von Hornhûsen meister Burkart reit

(05545.) hin kein Prûßen drâte.

(05546.) vrû unde spâte

(05547.) hatte er arbeit âne zil.

(05548.) der arbeit dûchte in nicht vil.

(05549.) dô er quam in daß lant,

(05550.) von brûderen wart er zû hant

(05551.) lieplîch und wol entpfangen.

(05552.) der marschalk quam gegangen

(05553.) zû dem meistere von Nieflant.

(05554.) der tet im sîne sache bekant,

(05555.) war umme er was komen dar.

(05556.) er bat die brûdere, daß ist wâr,

(05557.) daß sie wolden eine vart

(05558.) varen kein Karschowen wart.

(05559.) der bete wâren sie vil vrô.

(05560.) sie sprâchen algemeine alsô:

(05561.) “sunder wanc wir sîn bereit

(05562.) durch ûch lieb unde leit

(05563.) dulden zû allen zîten

(05564.) in reisen und in strîten.”

(05565.) al die wîle quam geriten

(05566.) mit crûcen nâch des ordens siten

(05567.) drîßec brûdere in einer rote

(05568.) von dûtschen landen; sie wolden gote

(05569.) endelîchen dienstes pflegen,

(05570.) wen sie hatten sich erwegen

(05571.) vrûnde, mâge und eigenschaft.

(05572.) sie enwâren dannoch nie wonhaft

(05573.) in keinen conventen gewesen.

(05574.) von dem marschalk wart gelesen

(05575.) von Prûßen brûdere ûf die vart.

(05576.) sus vûren sie ungespart

(05577.) vaste kein der Mimele zû.

(05578.) eß was wol zû mâßen vrû.

(05579.) under des von Nieflande

(05580.) bie des meres strande

(05581.) quam ein wunneclîcheß her

(05582.) vil wol bereitet zû der wer.

(05583.) Die Lettowen sâhen wol,

(05584.) daß sie ungevûgen zol

(05585.) gâben vor der vesten

(05586.) mit den lûten besten,

(05587.) wan sie zû sturme solden gân.

(05588.) sint ließen sie den sturm bestân

(05589.) und bereiten sich zû strîte

(05590.) zû der selben zîte

(05591.) und vûren hin kein Kûrlant.

(05592.) der meister kegen in zû hant

(05593.) quam mit zwein schônen hern,

(05594.) er wolde in iren gewalt wern.

(05595.) sîn her was michel und grôß,

(05596.) des iß doch wênic genôß.

(05597.) dô daß her zû beider sît

(05598.) sich bereite, daß ein strît

(05599.) sie beide mûste scheiden,

(05600.) die cristen und die heiden,

(05601.) die Kûren hatten vor gedâcht

(05602.) ein ding, daß wart vollenbrâcht

(05603.) zû den selben zîten:

(05604.) sie enwolden nicht dâ strîten.

(05605.) eß was ein gerâten rât,

(05606.) den sie volvûrten mit der tât.

(05607.) sie hattenß alsô ûf gegeben:

(05608.) ist, daß die brûdere daß leben

(05609.) verliesen und die walstat

(05610.) und ouch ir helfe wirdet mat,

(05611.) sô wolle wir sunder hêrren wesen;

(05612.) der dûtschen sal ouch nicht genesen

(05613.) die mit uns sin zû Kûrlant.

(05614.) dâ mite wichen sie zû hant.

(05615.) dô daß die Eisten sâhen,

(05616.) sie begunden gâhen

(05617.) vaste mit in von dannen.

(05618.) die brûdere mit iren mannen

(05619.) bestûnden und wânten dô,

(05620.) daß ir her wêre alsô,

(05621.) als sie eß hatten dar gebrâcht.

(05622.) zû vlîhene was in ungedâcht.

(05623.) dô sie dô helfe wânten hân,

(05624.) dô hatte ir helfe sie verlân.

(05625.) sie wurden ummeringet gar

(05626.) von der heidenschefte schar.

(05627.) dô sie zûr were griffen,

(05628.) dô was in entsliffen

(05629.) endelîchen gar ir wer.

(05630.) die Kûren alle mit ir her

(05631.) hatten dô die vlucht gegeben;

(05632.) ouch wolden sumelîch ir leben

(05633.) vriden vor den Eisten.

(05634.) die kunden vlîhen leisten,

(05635.) als sie dicke hân getân.

(05636.) dâ wurden in der nôt gelân

(05637.) die brûdere und die Semen gût.

(05638.) sie enhatten alle keinen mût,

(05639.) daß iemant solde vlîhen dan.

(05640.) dâ was harte manich man,

(05641.) der dâ nicht enweste daß,

(05642.) daß die Kûren durch einen haß

(05643.) hatten gewichen in der nôt.

(05644.) daß gab vil manchem manne den tôt,

(05645.) der durch der cristenheite vromen

(05646.) was zû strîte dar bekomen.

(05647.) des wart ummesloßßen

(05648.) manich helt unverdroßßen,

(05649.) daß er die bitter martir leit

(05650.) zû Dorben ûf dem velde breit,

(05651.) ê dan er quam zû der wer.

(05652.) die heiden vaste mit ir her

(05653.) hiwen die cristen aldar nider.

(05654.) vil cleine was die were wider,

(05655.) die dâ tet die cristenheit.

(05656.) der meister dâ die martir leit

(05657.) mit anderhalb hundert brûderen sîn.

(05658.) dâ was ouch manich pilgerîn,

(05659.) der dâ leit die selbe nôt

(05660.) durch got unde starken tôt.

(05661.) Dô der strît vergoßßen was,

(05662.) waß der cristen genas

(05663.) an brûderen und an knechten,

(05664.) die nicht mêr mochten vechten,

(05665.) an Semen und an pilgerîn,

(05666.) die mûsten durch des tôdes pîn

(05667.) wîchen, wie sie mochten.

(05668.) dâ nam gar unbevochten

(05669.) die heidenschaft vil grôßen roub.

(05670.) dannoch stûnt vil schôneß loub

(05671.) in dem walde her und dar,

(05672.) des nam die cristenheit gût war.

(05673.) die sich wolden dô genern

(05674.) und vor dem tôde sich bewern

(05675.) die nâmen in den walt den wich.

(05676.) vil mancher lernte dô den slich,

(05677.) dô in was misselungen.

(05678.) sus was daß her betwungen.

(05679.) meister Burkart, daß ist wâr,

(05680.) hatte vierdehalbeß jâr

(05681.) in Nieflande meister gewesen,

(05682.) als ich vor wâr hân gelesen,

(05683.) und mâßen vil mêre.

(05684.) man clagete in vil sêre.

(05685.) er was ein degen ûß erkorn.

(05686.) von Hornhûsen was er geborn.

(05687.) Dô der strît ergangen was,

(05688.) als ich ûch hie vor las,

(05689.) die lûte, die dannen quâmen,

(05690.) den wec sie wider nâmen

(05691.) durch grôß ungevilde,

(05692.) alsô sie wêren wilde,

(05693.) ie der man zû lande wart.

(05694.) der wec wart nicht gespart.

(05695.) sie wâren alle vreuden blôß,

(05696.) ir gemûte in zorne vlôß.

(05697.) dô die Semen quâmen

(05698.) zû lande, sie vernâmen,

(05699.) daß sie manchen vromen helt

(05700.) hatten verlorn gar ûß irwelt.

(05701.) die clageten sie vil manche tage

(05702.) mit vil bitterlîcher clage.

(05703.) ouch was der Natangen mût

(05704.) und der Prûßen mâßen gût

(05705.) und der Ermen alsô wol;

(05706.) sie hatten gegeben alle zol

(05707.) zû Dorben in deme strîte.

(05708.) sie vernâmen in der zîte,

(05709.) daß der marschalk ouch was bliben,

(05710.) der dicke hatte getriben

(05711.) urlouge mit der heidenschaft

(05712.) mit sîner wîsen brûdere craft.

(05713.) zû hant wurden dise lant,

(05714.) die ûch hie vor sint genant,

(05715.) wagenhaft algemeine

(05716.) grôß unde cleine

(05717.) und vornôierten sich gar

(05718.) von den cristen offenbâr.

(05719.) sehet, daß werte manchen tac,

(05720.) daß man nietlîchen pflac

(05721.) urlouges von in allen.

(05722.) eß was in sô gevallen.

(05723.) sint sante got der rîche

(05724.) sînen trôst genêdeclîche

(05725.) den brûderen in Prûßen lant,

(05726.) daß sie mit menlîcher hant

(05727.) und mit ganzem râte

(05728.) vrû unde spâte

(05729.) die Semen und die anderen lant,

(05730.) die sich hatten gewant

(05731.) von der cristenheit durch haß,

(05732.) betwungen baß und baß

(05733.) und brâchten sie zû den cristen

(05734.) mit urlouge und mit listen.

(05735.) In disen dingen hatten gesant

(05736.) die Kûren in Lettowen lant,

(05737.) daß sie in helfe brêchten

(05738.) und dar an gedêchten,

(05739.) daß sie wol bezîte

(05740.) hatten von dem strîte

(05741.) gewichen dâ zû Dorben.

(05742.) dô diß wart geworben,

(05743.) die Lettowen al zû hant

(05744.) quâmen hin zû Kûrlant

(05745.) mit irre helfe wol bereit.

(05746.) die Kûren wurden des gemeit

(05747.) und ir gemûte steic vil hô.

(05748.) in irme lande dâ lac dô

(05749.) eine burc, was Sintelîn genant,

(05750.) dar wurden al zû hant gesant

(05751.) die Lettowen, daß sie mit schaden

(05752.) die brûdere solden uberladen,

(05753.) wan eß was der Kûren mût,

(05754.) daß sie die gotes rittere gût

(05755.) ûß deme lande wolden haben.

(05756.) des hatten sie vil wol entsaben

(05757.) und satzten hûte grôß.

(05758.) der hûte niemande verdrôß.

(05759.) zû hant die Kûren undertân

(05760.) wurden den heiden sunder wân.

(05761.) zû hant dô reit ein bôser Kûr

(05762.) (sîn gemûte daß was sûr,

(05763.) sîn herze was der gallen vol,

(05764.) als ich ûch nû sagen sol)

(05765.) mit verrêtnisse hin.

(05766.) zû Goldingen stûnt sîn sin.

(05767.) Utilie was er genant,

(05768.) untrûwe was im wol bekant.

(05769.) dô er zû Goldingen quam,

(05770.) den kummentûr er zû im nam,

(05771.) er vlêhete sêre unde bat,

(05772.) der bete er im nicht abe trat,

(05773.) er sprach: “hêrre, du salt geben

(05774.) mir helfe, wen ich hân ein leben,

(05775.) als ein rechter cristen hât.

(05776.) ich enkêre mich an die tât,

(05777.) die die Kûren hân getân.

(05778.) dîne helfe wil ich hân,

(05779.) wen ich wil bie den cristen wesen,

(05780.) mit in sterben und genesen.

(05781.) mit kinden und mit wîben

(05782.) wil ich mit dir blîben.”

(05783.) der kummentûr nicht enließ,

(05784.) achte brûdere er hieß

(05785.) sich bereiten drâte

(05786.) mit einem snellen râte.

(05787.) dar mite ritten sie zû hant

(05788.) ûf ein hûs, daß ist genant

(05789.) Warrach, durch der cristen vromen.

(05790.) zû hant wurden sie genomen

(05791.) harte jêmerlîchen,

(05792.) man wolde in nicht entwîchen

(05793.) an keiner hande sachen.

(05794.) ein vûer man hieß machen,

(05795.) dar inne wurden al zû hant

(05796.) der brûdere ein teil von in gebrant.

(05797.) zuhowen wart in ouch ein teil.

(05798.) got der gebe ir sêle heil!

(05799.) sie liden martir, die was grôß:

(05800.) dar umme sint sie genôß

(05801.) der merterêre in himelrîch.

(05802.) doch bleib vil wunderlîch

(05803.) ein brûder ungetôtet;

(05804.) er wart doch vil genôtet

(05805.) von der Kûren manchen tac.

(05806.) vil wol er in daß widerwac,

(05807.) dô er ûß iren banden quam:

(05808.) vil manich Kûre sîn ende nam

(05809.) von sînenthalben, daß ist wâr.

(05810.) diß tet er alleß offenbâr.

(05811.) dise rede wil ich lân

(05812.) und wil ein andere bestân.

(05813.) Die burc, die dâ gebûwet was,

(05814.) zû Karschowen, als ich vor las,

(05815.) dâ wâren brûdere ûffe bliben,

(05816.) die daß urlouge triben

(05817.) mit vlîße harte manche tage.

(05818.) den wart geoffenbâret mit sage

(05819.) harte heimelîche,

(05820.) daß sich die lant gelîche

(05821.) hatten alle umme getân,

(05822.) die in zû helfe solden stân.

(05823.) des wurden sie vil gar unvrô.

(05824.) doch stûnt ir aller mût alsô,

(05825.) daß sie nicht wolden lâßen

(05826.) die burc, ûf der sie sâßen,

(05827.) die wîle sie mochten haben brôt.

(05828.) sint twanc sie hungers nôt,

(05829.) dô nicht spîse und helfe quam,

(05830.) daß ie der man den wich nam

(05831.) alênzelen, wâ sie wisten

(05832.) die brûder und die cristen.

(05833.) sus quâmen sie zû der Mimele.

(05834.) sie behûtte got von himele

(05835.) mit sîner grôßen majestât.

(05836.) sîn helfe sunder zwîvel stât

(05837.) allen den gerechten bie,

(05838.) von welchir hande zunge er sie.

(05839.) Der kummentûr nicht enließ,

(05840.) die brûdere er gemeine hieß

(05841.) brengen wider in ir lant.

(05842.) dâ mite nam man al zû hant

(05843.) und brâchte sie alle wider.

(05844.) die von Dobênen sider

(05845.) ließen ire burc ouch stân

(05846.) und bûben sich sân

(05847.) wider zû der cristenheit.

(05848.) daß was den Semegallen nicht leit.

(05849.) Von Hornhûsen meister Burkart,

(05850.) der zû Dorben geslagen wart,

(05851.) der hatte an sîner stat gelân

(05852.) einen brûder, den ich sân

(05853.) ûch allen wil benennen,

(05854.) waß ob ir sîn nicht bekennen!

(05855.) der was Juries genant

(05856.) und riet zû Nieflant

(05857.) mit er brûdere râte

(05858.) vrû unde spâte,

(05859.) daß er den lûten wol geviel.

(05860.) zuchte er gentzlîchen wiel.

(05861.) er was zû Segewalden

(05862.) den jungen und den alden

(05863.) kummentûr vur gewesen,

(05864.) daß mac ich vêrlîchen lesen.

(05865.) Brûder Juries der nam

(05866.) sîne brûdere, als eß gezam,

(05867.) und bat sie geben rât,

(05868.) den er volbrêchte mit der tât

(05869.) alsô, daß die cristenheit

(05870.) vergêße gar ir herzeleit,

(05871.) daß zû Dorben was getân.

(05872.) den rât sie gâben ime sân,

(05873.) daß er eine herevart

(05874.) besente rasch und ungespart.

(05875.) brûder Juries nicht enließ,

(05876.) sîne boten er hieß

(05877.) rîten in sîner brûdere lant.

(05878.) die boten riten al zû hant

(05879.) und tâten die mêre kunt

(05880.) den kummentûren zû der stunt.

(05881.) die kummentûr nicht enließen,

(05882.) ir lantvolk sie hießen

(05883.) und ouch die dûtschen dâ mite

(05884.) reisen nâch des landes site.

(05885.) zû hant die reise wart bereit,

(05886.) in wêre lieb oder leit

(05887.) ûf die vart kein den Kûren,

(05888.) den bôsen unde den sûren.

(05889.) die samenunge zû Rîge was.

(05890.) brûder Juries ûß den brûderen las,

(05891.) wen er was an des meisters stat,

(05892.) einen brûder, den er bat

(05893.) mit der brûdere rate,

(05894.) daß er wolde drâte

(05895.) vort rîten mit dem her

(05896.) kein Kûrlande bie dem mer

(05897.) unde hette sîne gewalt

(05898.) uber jung und uber alt,

(05899.) die zû der reise wâren komen.

(05900.) dô er die rede hatte vernomen,

(05901.) der bete er gewerte dô

(05902.) den meister und was des vrô,

(05903.) daß er die Kûren solde hern.

(05904.) er sprach: “wir wollen bewern

(05905.) den Kûren iren ubermût.

(05906.) wir wollen in gote sîn behût.”

(05907.) dâ mite kârte er bie dem mere

(05908.) vaste hin mit sîme here.

(05909.) brûder Juries von der Rîge reit

(05910.) zû Segewalde. im was leit,

(05911.) daß er nicht solde reisen mite.

(05912.) Al die wîle in gûter site

(05913.) quam daß her in Kûrlant.

(05914.) daß wart zû Goldingen bekant

(05915.) den brûderen, die dâ wâren.

(05916.) sie sprâchen offenbâren:

(05917.) “uns wil got ergetzen

(05918.) leides, wir wollen uns setzen

(05919.) wider die bôsen Kûren

(05920.) unse nâkebûren.”

(05921.) sie nâmen, die sie mochten hân,

(05922.) knechte, Kûren und riten sân

(05923.) kein dem here, daß dâ quam.

(05924.) der meister in dem here nam

(05925.) und entpfienc die brûdere wol

(05926.) von Goldingen. er sprach: “ich sol

(05927.) hôren, waß ir râtes gebet.

(05928.) mir ist lieb, daß ir noch lebet.”

(05929.) nâch irme râte kârte er zû hant

(05930.) vor ein hûs, daß was genant

(05931.) Sinteles, daß lac in bie.

(05932.) dâ wâren ûffe sorgen vrie

(05933.) Lettowen, die verdienten solt.

(05934.) den Kûren wâren sie vil holt.

(05935.) dô der cristen her dô quam

(05936.) vor die burc, die rûe eß nam

(05937.) die nacht biß an den morgen vrû.

(05938.) dô trâten sie der burge zû

(05939.) mit eime sturme, der was grôß,

(05940.) des die cristenheit genôß.

(05941.) zû sturme was in allen gâch,

(05942.) die graben vulten sie dar nâch

(05943.) mit holtze und entpranten daß.

(05944.) vil mancher ûf der burge saß,

(05945.) der von Lettowen was komen,

(05946.) als ir hie vor habt vernomen,

(05947.) der gerne gegeben hette solt

(05948.) und dar zû silber unde golt,

(05949.) daß er mochte sîn entriten

(05950.) von den brûderen unbestriten.

(05951.) dô der grabe was entprant,

(05952.) daß vûer steic al zû hant

(05953.) in die burc mit flammen grôß.

(05954.) daß vûer alumme und umme slôß.

(05955.) dannoch stûnden gar zûr wer

(05956.) die Lettowen kein der brûdere her

(05957.) al mitten in der glûte.

(05958.) vil grim was ir gemûte,

(05959.) wen sie liden grôße nôt

(05960.) und sâhen den gewissen tôt,

(05961.) den sie nicht mochten ummegân.

(05962.) daß leben mûsten sie dâ lân,

(05963.) in der glûte man sie slûc.

(05964.) daß her ouch ûß dem vûere trûc

(05965.) roubes vil, daß ist wâr.

(05966.) waß Kûren was uber eilf jâr,

(05967.) die wurden alle tôt geslagen

(05968.) und wider in daß vûer getragen.

(05969.) waß der jungen Kûren quam

(05970.) ûß dem vûre, man die nam

(05971.) gevangen und dar zû die wieb,

(05972.) die dâ wolden iren lieb

(05973.) generen vor dem brande,

(05974.) die mûsten ire hande

(05975.) den brûderen bieten umme daß leben.

(05976.) daß wart vil mancher dâ gegeben.

(05977.) Dâ man die burc hatte verbrant,

(05978.) daß her daß kârte zû hant

(05979.) zû Asseboten vor daß hûs.

(05980.) sie wâren stille sam ein mûs

(05981.) die ûffe der burge wâren.

(05982.) ir schallen sie vorbâren,

(05983.) wen sie hatten wol gehôrt,

(05984.) wie eß was irgangen dort

(05985.) zû Sintels den Lettowen.

(05986.) sie enmochten dâ nicht drowen,

(05987.) sie gâben sich in der brûder hant.

(05988.) man nam ir kindere vor ein pfant

(05989.) von den besten allen.

(05990.) sint ließen sie ir schallen,

(05991.) daß sie hatten vor getân.

(05992.) die brûdere von Goldingen sân

(05993.) kein ir burge kârten wider.

(05994.) daß grôße her daß zogete sider

(05995.) zû Rîge harte wol gesunt.

(05996.) dô lobete al der cristen munt

(05997.) got und die liebe mûter sîn,

(05998.) daß ir helfe was wurden schîn

(05999.) al der armen cristenheit.

(06000.) In wurden andere mêre geseit,

(06001.) daß die Lettowen her und dar

(06002.) kêrten mit vil mancher schar

(06003.) dâ zû Nieflande

(06004.) mit roube und mit brande.

(06005.) zû hant sich machte ûf die vart

(06006.) der brûder her gar ungespart

(06007.) und nam die spîse mite

(06008.) rechte nâch des landes site.

(06009.) wer dâ wol geriten was

(06010.) die besten er vil snelle ûß las

(06011.) und rante ûf die wege,

(06012.) die die heiden zû ir pflege

(06013.) solden wider zû lande varn;

(06014.) die wege wolden sie bewarn.

(06015.) der brûder her dâ zogete nâch,

(06016.) ûf die heiden was in gâch.

(06017.) zû hant die wartlûte gût

(06018.) die warte hatten wol behût

(06019.) und quâmen gerant.

(06020.) den brûderen tâten sie bekant,

(06021.) sie sprâchen: “wol ûf drâte

(06022.) mit einem snellen râte!

(06023.) daß her der heiden ist uns bie.

(06024.) wie eß dar umme gestellet sie,

(06025.) niemant vromer sol verzagen.

(06026.) vor wâr wir ûch die mêre sagen.”

Saturs

Ðîs sadaïas teksta tulkojums latvieðu valodâ (05007.-06026.rinda)

Iepriekðçjâ sadaïa vidusaugðvâcu valodâ (04031.-05008.rinda)

Nâkamâ sadaïa vidusaugðvâcu valodâ (06027.-07058.rinda)

HISTORIA.LV